Iñaki Petxarroman Berria-ko zuzendariordeak jarritako bertsoak. Doinua: Habanera. (‘Argia‘)
2003ko otsailak
hogei zituenerako,
lantoki genuen hura
itxi zuten betirako.
Martin Ugalde parkea,
eguna argitzerako,
mamu berdez betea zen,
zetorren orori “alto!”.
Lantokiaren atean,
ohar eta giltzarrapo,
urteetako ametsa
bukatua zen de facto.
Euskarak behar gintuen,
atera Tolosarako,
Egunkaria-ren lana
Egunero hasten delako.
***
Itxia eta ez isildua
lehen mezu eta hizki,
biharamuneko azala
jaso genuen ederki.
Torturen itzal luzean
erori ginen deblauki,
elkartasun uholdea
gezur artean aterki.
Donostia gainezka eginda,
goraka hasi poliki,
nahiz bidea zaila izan
aurrera egin behar beti.
Egunkaria ez bada
beste bat behar zen aurki:
haiek itxita nahi zuten
eta guk Berria ireki.
***
Hamaika urte luzetan
mehatxuaren esklabo,
polizi eta epaileak
gezur artean oparo.
Lehenik absoluzioa
ezin lasaitu zeharo,
artxibatu ondorenean
lo egin dugu lasaiago.
Buruan dugu babestu
gaituen herria, klaro!
Asko eman diguzuenoi,
ezin eskatu gehiago.
Eta etsaiek zenbat kalte,
zenbat sumin, zenbat trago…
Auzia amaitu da baina
mina oraindik hor dago.